Efniseiningin Accordion er notuð til að búa til harmónikkulista (fellilista, plús-lista). Hana má nota til að fela texta á bakvið fyrirsagnir og stytta síðuna ef hún er mjög löng og efnismikil. Það auðveldar lesendum að skanna yfir textann á síðunni.
Í reitinn Title kemur fyrirsögn.
Í textareitinn fyrir neðan kemur textinn sem á að vera undir fyrirsögninni. Hér gilda almennar reglur um framsetningu texta á vefnum. Þessi reitur er fyrst og fremst fyrir texta, en það er líka hægt að birta myndir í honum. Stillingin í Text format-hlutanum þarf þá að vera Rich text.
Til að bæta öðru atriði við listann smellir þú á hnappinn Add Accordion item neðst í einingunni.
Atriðum í listanum má svo endurraða með því að draga þau upp eða niður með músinni. Sjá leiðbeiningar: Einingar færðar til.
Í stillingum fyrir harmónikkulistann, efst í einingunni, er möguleikinn Enable search. Ef merkt er við hann birtist leitargluggi fyrir ofan listann. Það hentar vel ef listinn er efnismikill. Fólk á þá ekki að þurfa að opna hvert einasta atriði í listanum til að finna upplýsingar sem leitað er að.
ATH: Það er ekki hægt að hafa harmónikkulista inni í öðrum harmónikkulista.
Annar möguleiki við að stytta efnismikla síðu er að stilla henni upp í flipa.
Tenglar í harmónikkulista.
Það er hægt að útbúa beina tengla í ákveðna staði í harmónikkulistanum. (ATH. þó ekki á námsleiðasíðum). Tenglarnir opna viðkomandi stað og sýna strax upplýsingarnar á bakvið fyrirsögnina.
Dæmi:
Búum til tengil í upplýsingar um jafnréttisnefnd á síðunni University Council Committees.
Fyrirsögnin sem við viljum opna heitir Equal Rights Committee.
Aftan við slóð síðunnar bætum við #-merki (kassamerki, númersmerki, hashtag-merki).
- Á eftir kassamerkinu er bætt við heitinu á fyrirsögninni.
- Í staðinn fyrir bil er sett - (bandstrik).
- Ef spurningamerki er í fyrirsögninni er það ekki haft með í slóðinni.
- Hér skiptir líka máli að hástafir og lágstafir í slóðinni séu eins og í fyrirsögninni.
Í þessu tilfelli verður viðbótin við slóðina #Equal-Rights-Committee.
Slóðin sem við notum er þá https://english.hi.is/about-ui/governance/university-council-committees#Equal-Rights-Committee.
Vefvænni framsetning: Equal Rights Committee.